Balade 610 : J’aime tresfort et de tresgrant amour (DCCCCLXIII)
Autre Balade
― J’aime tresfort et de tresgrant amour
Une dame qu’en son pais n’a tele,
Mais de mon fait n’ose faire clamour
Ne semblant nul, car l’amour est mortele.
5 ― Qui le sçaroit ? ― Ta folie est cruele,
Pour estre mort et tiré comme un chien !
― Qui te verroit ? Or hoste ton cuer d’elle :
Char a espee au jour d’uy ne vault rien.
Qui ayment hault, c’est peril et paour,
10 Ardent desir, doleur qui renouvelle,
Deduit emblé qui fait po de douçour,
Et s’om le scet ou qu’il en soit nouvelle,
Passer en fault la mort par la lemesle.
Si haulte amour a homme ne vault rien.
15 Ayme en bas lieu, quier povre femme et belle :
Char a espee au jour d’uy ne vault rien. 251d
Et lors pourras aler de jour en jour
Et seurement prandre ploisir[1] a elle,
Et devant tous faire illec ton sejour
20 Sans peril nul, car haulte amour chancelle,
Mais ceste cy est plus seure en sa selle.
Se petite est, fay la riche du tien,
Et se bonne est, passe illec ta nacelle.
Char a espee au jour d’ui ne vault rien.
L’envoy
25 ― Compains, par Dieu, vous dittes le millour.
C’est grant peril que d’amer en destour
Ne haultement, plus y a mal que bien.
Pour les perilz vueil eschiver ce tour
Et en bas lieu vueil faire mon retour :
30 Char a espee au jour d’ui ne vault rien.
[1] Saint Hilaire corrige en plaisir
