Balade 609 : Levres mouvoir sanz cuer a oroison (DCCCCLXII)
Balade
Levres mouvoir sanz cuer a oroison
N’est pas a Dieu prenant ne aceptable,
Mais ne lui est c’une desrision
Quant le cuer est aux levres variable :
5 Car par le cuer est la bouche mentable.
Quant il ne veult ce que la bouche dit.
Ainsis donnons qui pis vault qu’escondit
A maintes gens par levres au jour d’ui.
Or gardent bien leur don et leur escript,
10 Car de telz dons voy po joir nullui.
Cilz prie en vain qui n’a devocion,
Neiz quant le cuer est ailleurs entendable.
Bouche parle, mais c’est decepcion,
Que Dieu n’a pas ne les sains agreable.
15 Des donneurs d’ui voy la chose semblable.
Car puis qu’ilz ont de bouche leur don dit,
Le cuer paier a mains le contredit,
Qui du pourchas ont grant paine et anuy.
Folie font s’ilz ne sentent le dit :
20 Car de telz dons voy pou jouir nullui.
Si naist de ce murmure et achoison,
De tel donnant estre desagreable
Quant il ne fait sanz faulte avoir le don 251c
Qu’il a promis. Estre doit homme estable.
25 Ne mente ja. Soit avant refusable
Que d’octroier, qui engendre mesdit
Sur son octroy, quant il ne l’acomplit.
Ains de telz gens bonne chançon ne luy :
Eulx ny autres n’y ara ja proufit,
30 Car de telz dons voy po jouir nulluy.
L’envoy
Princes, chascun ait le cuer veritable,
Face son don et sa parole estable
Puis qu’il promet. Du temps esbahi suy
Que le cuer n’est a la bouche acordable,
35 Dont je puis bien dire a touz[1] ce notable :
Car de telz dons voy po jouir nulluy.
[1] Ms. a touz dire
