Balade 608 : Gente de corps, face a droit coulouree (DCCCCLX)

Autre Balade amoureuse

                        Gente de corps, face a droit coulouree,
                        Humble regart, front hault et bien assis,
                        Entr’ueil plaisant, bouche bien ordonnee,
                        Petit menton, le fres et nez traitis,
5                      Voz joettes font deux fosses toudis,
                        En soubzriant, o belle plus que belle !
                        Vous regarder est un droit paradis :
                        De jour en jour vo beauté renouvelle.

                        Car vostre chief a toute gent agree,
10                    Blont com fin or, vairs oeulx et les sourcils
                        Avéz petiz, la denteure serree,
                        Mannette blanche com[me] fleur de lis,
                        Et au seurplus est vo corps assevis
                        De tous les biens qui sont en flour nouvelle.
15                    De plus en plus, dame, ce m’est advis,
                        De jour en jour vo beauté renouvelle.

                        Or estes vous donc de bonne heure nee,
                        Quant grace avéz, la louenge et le pris
                        D’umilité, de nobles meurs paree,
20                    De beau maintien, de maniere et de vis.
                        Mais sur toutes portéz bien voz habis,
                        Plus que nulle dame ne damoiselle
                        Qui soit vivant en terre n’en pays :
                        De jour en jour vo beauté renouvelle.                                              250c

                        [Envoy][1]

25                    Dame que j’aim, de vostre amour souspris,
                        Pour voz grans biens me vient douce nouvelle,
                        Mes cuers s’esjouist, car certains suis et fis
                        De jour en jour vo beauté renouvelle.

[1] Ms. Double chançon royal ; Saint Hilaire corrige en L’envoy