Balade 607 : J’ay veu la riviere de Saine (DCCCCLIX)

Autre Balade

                        J’ay veu la riviere de Saine,
                        Du Rosne, de Laire et du Ryn,
                        Par inundacion soudaine,
                        Courre es champs et par le chemin
5                      Comme une mer, et leur train
                        Demourer une longue espace
                        De temps, et puis celle eslevace
                        Se departoir soudainement,
                        Faisant l’eaue des flums plus basse :
10                    Pour dure chose violent.

                        Avoir gaingnié sanz cause et paine,
                        Par malice ou maint sont enclin,
                        Suronde, et lors Orgueil le maine
                        Un temps regner, mais en la fin
15                    Vient un pechié ou un hutin,
                        Qui tel acquest toult et efface
                        Et emporte, quant le flun passe,
                        L’acquest du propre tenement
                        Bien acquis. Hom[1] ne se mefface :
20                    Pou dure chose violent.

                        La petite riviere est plaine
                        Et le petit fleuve enterin
                        D’yaue en tout temps, car il n’a vayne
                        Qui tende a grever son voisin.
25                    Il ne soufle pas du venin
                        D’autre euaue, toudis tient sa place
                        Quant [en] ses rives se soulace
                        Sanz exceder aucunement.
                        Tout homme a ceste exemple face :                                                 250b
30                    Pou dure chose violent.

                        L’envoy

                        Prince, pour avoir ne pour grace
                        Ne soit homme trop acquerant,
                        Tiengne le moien et pourchace :
                        Pou dure chose violent.

[1] Ms. homme