Balade 605 : Ce jour de l’an estrener ne sçaroie (DCCCCLVII)
Autre Balade qui parle des estraines du jour de l’an
Ce jour de l’an estrener ne sçaroie
Com[me] j’ay fait ou bon temps de jadis,
Ou toute honeur couroit et toute joye
Sanz mal penser, tricherie ou mesdis,
5 Car s’au jour d’uy venoit de paradis
Homme ou femme, souz[1] forme angelical,
Parlans entr’eulx, y penseroit on mal,
Tant est chascun plain de mauvese vie. 249c
Or vous gart Dieux, dame, en especial,
10 De faulx parler et de mauvaise envie.
Car par ces deux, s’ainsi est qu’om les croye,
Seront tous maulx et tous mortelz perilz,
Les bons destruis et les maulvais en voie.
Chascuns sera l’un a l’autre ennemis,
15 Amours faulra, car amie n’amis
Ne seront plus. Toute chose loyal
Par ces .ii. poins prandra terme final,
Desirant mort, se Dieux n’y remedie,
Qui nous vueille garder en general
20 De faulx parler et de mauvese envie.
Las ! au jour d’uy ne court autre monnoye
Entre les gens et en pluseurs pays.
Li cuers des bons et des bonnes en noye
En triste flum des pensers esbahis,
25 Quant se voient par paroles trahis
Mauvesement, de crime capital
Contre raison. O court celestial,
Prince de paix, les bons n’oubliéz mie
Mais les vengéz par justice royal
30 De faulx parler et de mauvese envie.
L’envoy
Prince, mettéz le frain, qu’om ne le voye
Jamais regner. A ces .ii. je vouldroye
Qu’ilz fussent mors de mal d’espilencie,
Ou estrangléz d’une bonne courroye.
35 Mais je pri[2] Dieu qu’il nous gart toute voie
De faulx parler et de mauvaise envie.
[1] Ms. sanz
[2] Ms. prie
