Balade 604 : Dieux gart la belle compaignie (DCCCCLIV)
Autre Balade sur Envie et Povreté
― Dieux gart la belle compaignie,
Dist Povreté en trespassant
A pluseurs qui ont dit : ― Amie,
Ou aléz vous ainsi trassant ?
5 Et elle respont en plourant :
― Je quier Envie la dervee
Qui sont corps a ame ne vee
Fors a moy que pas ne secourt.
Lors dist une nonnain sacree :
10 ― Envie est en cloistre et en court.
― Le sçavéz[1] vous bien, je vous prie,
Que de ce ne m’aléz moquant ?
― Oil, par la vierge Marie,
Elle y est toudis demourant.
15 Par lui va chascun murmurant.
Maint debat et mainte meslee
Fait chascun jour, mainte assemblee,
Tousjours de l’un a l’autre court :
La ne puet paix estre trouvee,
20 Envie est en cloistre et a court.
― Dit elle voir ? ― N’en doubtéz mie.
Je la vis hier en retournant
De la court. La s’estoit tapie,
Mais de debas y faisoit tant
25 Que l’un derrier, l’autre devant
Se disoient mainte goulee.
En ces .ii. lieus est hostelee,
Principalment fait la son hourt.
Aléz tost, soyéz asseuree, 248c
30 Envie est en cloistre et a court.
L’envoy
Prince, Povreté s’est hastee,
A court, en cloistre en est alee.
Envie ne lui fait le sourt,
Mais c’est tantost en lui boutee,
35 Disant qu’en chascune contree
Envie est en cloistre et a court.
[1] Ms. scavex
