Balade 603 : Chascuns doit faire son devoir (DCCCCLIII)
Autre Balade
Chascuns doit faire son devoir 248a
Es estas ou il est commis
Et dire a son seigneur le voir
Si que crainte, faveur n’amis,
5 Dons n’amour ne lui soient mis
Au devant pour dissimuler
Raison, ne craingne le parler
Des mauvais, soit[1] humbles et doulz.
Pour menaces ne doit trembler :
10 On ne puet[2] estre amé de tous.
Ait Dieu tout homme a son pouoir
Devant ses oeulx, face toudis
Ce qu’il devra sanz decepvoit.
Lors ne pourront ses ennemis
15 Luy grever, mais seront soubmis
Par cellui qui tout puet garder,
Qui scet les euvres regarder
Des bons et mauvais cy dessoubz,
Pugnir maulx, biens remunerer :
20 On ne puet estre amé de tous.
Car gens qui ont mauvais vouloir
Heent ceuls dont ilz sont pugnis,
Et il vault mieulx la grace avoir
De Dieu, pour gaingner paradis,
25 Qu’il ne fait des faulx[3] cuers faillis
Qui veulent mentir et flater
Et par leur force surmonter
Les frans cuers et mettre a genoulz.
Faisons bien sanz homme doubter :
30 On ne peut estre amé de tous.
L’envoy
Prince, nul ne doit desirer
Pour le los du monde regner,
Mais des biens de Dieu soit jaloux.
Ses officiers doit [sup]porter 248b
35 S’ilz font bien et les contenter :
On ne puet estre amé de tous.
[1] Ms. sont
[2] Ms. puet pas
[3] Ms. mauvais
