Balade 602 : Vous, gouverneurs, baillis, et seneschaulx (DCCCCLII)
Autre Balade sur gouverneurs, baillis et seneschaulx
Vous, gouverneurs, baillis, et seneschaulx,
Il [vous] convient esclaves demourer[1]
En voz marches a .vii. ou.viii. chevaulx,
Sanz departir, voz estaz gouverner,
5 D’un franc par jour, et si vous fault jurer
Combien chascun aura fait residence
En son estat, par nouvelle ordonnance, 247d
Contreroleurs aréz sur le pais,
Les recepveurs ou royaume de France,
10 Serfz gouverneurs, seneschaux et baillis.
Vous ne seréz plus des provinces baux,
Les procureurs vous fauldra encliner
Et receveurs. Et dont vient telz consaulx
Que le grant fault au mendre subomb[r]er ?
15 Et frans hom[me]s n’osera pas aler
Sur le pais ou il a sa chevance
Sanz estre cas. Vez ci large ignorance
Dont maint lairont les estas dessus dis.
Qui ne vouldront estre en tele meschance,
20 Serfs gouverneurs, seneschaulx et baillis.
Mais au jour d’ui a Justice tous maulx
Et chascun veult celle supediter,
Et les petiz ravir les lieux des haulx,
Pour les estaz destruire et ruyner.
25 C’est grant peril de chetis eslever
En hault estat, c’est default de prudence.
Chascun ne tent qu’a la fin ou il pense
Et a bouter avant de ses amis.
C’est ce qui fait par tel gens qu’on avance
30 Serfs gouverneurs, seneschaulx et baillis.
L’envoy
Prince, de ceulx qui ont grant apparence
N’ensuit tousjours la bonne consequence.
Les plus grans clers ne sont saiges toudis.
Aux ignorans commet Dieux sa puissance.
35 Ostéz ce mot qui est de malvueillance,
Serfz gouverneurs, seneschaulx et baillis.
[1] Ms. demouréz
