Balade 601 : Pour un saint corps miraculeux (DCCCCLI)
Autre Balade sur un saint corps miraculeux comme uns loups
Pour un saint corps miraculeux
Qui la langue a en deux parties,
Plain de pité comme est uns leux,
Suis chargiéz d’escripre la vie.
5 Mais pour ce qu’en lui n’a envie
N’orgeuil, ne qu’en lion et chien,
Se nulz m’en scet dire aucun bien,
Je le tendray secret com prestre.
Mais avant c’om m’en die rien,
10 Or devinéz qui ce puet estre.
J’adevine qu’il fut claustreux,
Chief du martel d’orfavrerie.
De saint lieu fist palays doubteux
Pour approuchier de seignourie, 247c
15 Traittans l’or non pas d’alquemie
Mais du commun peuple, et sçay bien
Que cilz vint de povre merrien,
Qui n’ensuist en meurs saint Silvestre,
Ains veult bien l’autrui[1] et le sien :
20 Or devinéz qui ce puet estre.
J’en sçay bien un ingrade a ceulx
Qui povre lui firent aye,
Aux bons se rent suspeçonneux,
Desobeissant qui le prie.
25 En ce qu’il doit faire il varie,
Il s’entent, chante et list tresbien
A reculons. Saint Julien
Ne voult pas de son hostel nestre.
Taiche n’a de saint Gracien :
30 Or devinéz qui ce puet estre.
L’envoy
Princes, ces grans miracles seulz
Sont a escripre merveilleux
Pour canoniser nostre maistre,
Qui fait ses responses par deux
35 En doublant sa langue en trois neux :
Or regardéz qui ce puet estre.
[1] Saint Hilaire corrige en veult l’autrui bien
