Balade 600 : Corps monstrueus, horrible a regarder (DCCCCL)
Autre Balade sur prodiges et corps monstrueux
Corps monstrueus, horrible a regarder,
Prodige grant de vengence future,
Beste a deux dos qui fait le monde errer,
Langue double dont parle l’escripture,
5 Venin cuisant, serpentine figure
Qu’enfer attent, faulx conseil variable,
Juge vendant la grace charitable,
Chien envieux, de convoitise plain,
Qui d’Antecrist est voie preparable,
10 Dieux nous vueille tous getter de ta main !
Las ! ta forme fait trop a redoubter,
Et tes membres plains de toute laidure
Qui vendent tout ce qu’on souloit donner,
Ne tu ne veulz congnoistre creature
15 Qui face bien. Tu faiz contre droiture
Guerre et tourment, toute chose nuisable.
Estre ne veulz a Verté[1] consachable.
De male heure fus pour le peuple humain
Conceuz et nez, comme chose dampnable. 247b
20 Dieu nous vueille tous getter de ta main !
Par tes euvres puet on asséz noter
L’advenement du renoyé parjure,
L’ennemi Dieu qui se venrra monstrer
Prochainement, car on ne fait qu’injure.
25 On est larron, homicide ou parjure.
A ton temps est tout vice celebrable,
L’en prant, l’en toult, [et] chascun est coupable
Et haineux, convoiteus et haultain,
Fel, orgueilleus. Monstre tresdecevable,
30 Dieux nous veuille tous getter de ta main !
Beste a .ii. chiefs, qui ne vis[2] que d’ordure
Et qui corromps toute humaine nature,
De toy parle l’Apocalipce a plain,
Sebille aussi. Jouachin te figure
35 Dolentement [par] fiens et pourreture :
Dieux nous veuille touz getter de ta main !
[1] Ms. verite
[2] Ms. vit
