Balade 599 : Se Verité veult estre menteresse (DCCCCXLIX)
Balade comment Verité, Charité et Loyauté, Foy et Creance font au jour d’uy le contraire de leurs noms
Se Verité veult estre menteresse,
Et loyaulté veult estre desloial,
Et Charité veult estre larronnesse,
Et Creance se veult tourner a mal,
5 Et foy ne veult qu’il soit homme loial,
Et glote soit devenue Abstinence,
Humilité en orgueil et bobance,
Et Pité ait le cuer plus dure que roche,
Tous ces signes donnent signifiance
10 Que pour noz maulx la fin du monde approche.
Se Chasteté fait Luxure maistresse,
Se Povreté veult aler a cheval,
Se Pacience homicide qui blesse
Veult par pouoir tout getter contreval,
15 Se Largesce qui ja fut curial
Veult convoitans tenir or et finance,
Se lasche veult et mole este Vaillance,
Se Noblesse a villenie en sa poche, 247a
L’en peut jugier par tel perseverance
20 Que pour noz maulx la fin du monde approche.
Se Paour est de Dieu en hardiesce
De lui courcier, s’amour gettee aval
Des cuers mondains es estas de noblesse,
Saiche chascun que c’est le principal
25 Que doubter Dieu, pere celestial,
Qui tous nous a forméz a sa semblance,
Et tuit faisons contre son ordonnance,
Car vertu n’est qui en vice ne troche :
Dont je conclus et ay ferme esperance
30 Que pour noz maulx la fin du monde approche.
