Balade 597 : Mon tresdoulz cuer, m’amour tresdiree (DCCCCXLVII)
Autre Balade de la complainte que un amant fait a sa dame amoureusement
Mon tresdoulz cuer, m’amour tresdiree,
A qui je doing cuer, corps, et quanque j’ay,
Riche d’oneur, de beau maintien paree,
Jamais autre dame fors vous n’aray.
5 Or regardéz comment durer pourray,
Ne que fera mon cuer qui sent tel paine.
Se pitié n’est et vostre humble cuer gay,
Languir me fault, ma dame souveraine,
En qui je voy toute beauté louee,
10 Vertus de meurs, douce rose de May,
Saige en parler, en maniere atrempee,
Toute bonne, pour voz grans bien m’esmay,
A tousjours mais vostre servent seray.
C’est bien raison, soiéz de pitié plaine
15 Envers moy donc, ou je vous jur pour vray :
Languir me fault, ma dame souveraine.
Mais pour sçavoir s’il ne vous desagree,
De vo servent le nom escript vous ay,
Le vostre avant, pour estre acertenee.
20 Et s’il vous plaist, bien le vous monstreray :
Es deux couplés premiers vous aprandray
Tous ces .ii. noms pour estre plus certaine
De vostre amant, mais certes s’octroy n’ay,
Languir me fault, ma dame souveraine.
L’envoy
25 Belle et bonne, jeusne, gente, acesmee, 246c
Plaisant a tous, face a droit coulouree,
Le vray miroer de la beauté humaine,
Corps long et droit, sur toutes honouree,
Se puté n’est en vo cuer pour moy nee,
30 Languir me fault, ma dame souveraine.
