Balade 596 : Envies, machinacions (DCCCCXLVI)

Balade comment envies, haines et convoitises desordonnees regnent au jour d’ui partout

                        Envies, machinacions,
                        Convoitises desordonnees,
                        Haines, machinacions,
                        Sont pieça pour noz pechiéz nees,
5                      Fault de bien, dures annees,
                        Mors soudaines, guerres partout,
                        Pluies, noifs, tempestes, gelees,
                        Mais encor[1] n’est ce pas le tout.

                        Car les nobles condicions
10                    Et les vertus sont adirees
                        En l’Eglise, es religions,
                        Es roys, es princes des contrees.
                        En toutes gens les lois blecees
                        Si fort que li juge sont rout
15                    Et seignouries declinees :
                        Mais encor[2] n’est ce pas le bout.

                        Le temps des renovacions
                        Qui ont esté prenostiquees,
                        Pour les pechiéz que nous faisons
20                    Nous sont a present demonstrees
                        Par les loys qui sont divisees.
                        L’an mil. cccc. je me doubt
                        D’estre monarchies muees :
                        Mais encor[3] n’est ce pas le bout.

                        L’envoy

25                    Princes, faittes vos oroisons,                                                             246b
                        A Dieu tuit nous humilions.
                        Pechiéz trop en nostre hostel crout.
                        Cilz fait avoir pugnicions
                        Aux pecheurs, ce doubter devons :
30                    Mais encor[4] n’est ce pas le bout.

[1] Ms. encores

[2] Ms. encores

[3] Ms. encores

[4] Ms. encores