Balade 594 : Quelz nouvelles, gentils compains (DCCCCXLIII)
Autre Balade sur tous maulx qui regnent en chascune court
― Quelz nouvelles, gentils compains ?
Que vous semble il du temps qui court ?
Ne mentéz pas. ― Soiéz certains
Que je le vous diray au court.
5 Tout mal voy en chascune court,
Envie, couvoitise, ordure,
Traison, orgueil et luxure. 245c
Preudomes hors, regner felons.
On n’y fait raison ne droiture.
10 ― Tais toy : les dens devant sont bons.
― Au jour d’uy sont parlers villains,
Gouliart, deshonneste, lourt.
L’en regnie Dieu et sessains,
On parle a eulx hault, qu’ilz sont sourt.
15 Gieu de dez et de diable sourt,
Des quelz naist debat et injure.
L’en maugree Dieu et parjure
Mil[le] fois entre les barons
Pour neant : n’est ce grant laidure ?
20 ― Tais toy : les dens devant son bons.
― Les religieux sont mondains,
Pour argent benefice a court,
Publique est le lieu des nonnains,
Verité es grans clers decourt,
25 Trop scevent les juges de hourt,
Nobles sont contre l’escripture,
Marchant, et toute creature
Peche en son art. Dieu ne doubtons :
Ne sçay pour quoy tant nous endure.
30 ― Tais toy. Les dens devant sont bons.
L’envoy
― Sire, j’ay dit verité pure,
Mais puet estre qu’om n’en a cure.
Au jour d’uy li temps est felons,
Car par mentir chascun procure
35 Or et argent, c’est chose dure.
― Tais toy. Les fens devant sont bons.
