Balade 593 : Tresdolente et desconfortee (DCCCCXLII)

Autre Balade de la grant complainte de Babiloine

                        Tresdolente et desconfortee,
                        Dolereuse et plaine d’annuy,
                        De toute misere plantee,
                        Plus chetive onques ne congnuy.
5                      Qu’amee ne suis de nullui,                                                                 245b
                        Mais haye en ciel et en terre
                        Pour mes pechiéz, si com je lui :
                        Car tout le monde me fait guerre.

                        Trop fu en orgueil eslevee,
10                    Par convoitise me deçuy,
                        Haultaine ay trop esté nommee.
                        Oncques loial conseil ne cruy,
                        Et pour ce nul ami ne truy,
                        Pour mes maulx n’ose Dieu requerre.
15                    Las ! ou prandray je mon refuy ?
                        Car tout le monde me fait guerre.

                        Babiloine suy, desolee,
                        Comme deserte. Encor sont duy,
                        Vaine gloire, la char doulee,
20                    Qui m’ont enclose en leur estuy.
                        Non congnoistre ce que je duy
                        M’ont fait, toute haine acquerre,
                        Tant que j’ay le mal gré d’autruy,
                        Car tout le monde me fait guerre.

                        L’envoy

25                    Dieux, donnéz moy cuer et pensee
                        D’amender mon cuer qui trop erre,
                        Ou briefment seray transmuee.
                        Car tout le monde me fait guerre.