Balade 592 : Je voy planter ce qui ne vault (DCCCCXLI)
Balade comment on eslieve au jour d’ui male herbe en hault et l’aiss’on la bonne
Je voy planter ce qui ne vault,
Dont le fruit ne puet estre bon,
Et eslever male herbe en hault.
Je voy caupetrape et chardon
5 Qui de leur semence font don,
Dont la terre est toute peuplee.
Destruicte en est la bonne blee,
Dont le temps nous sera trop chier.
Soit donc tel[1] semence estrepee :
10 Faisons le bon plant aluchier.
Du plant mauvais vient le default,
Tout destruit : pour quoy ne l’ost’on ? 245a
Avoir trop grant famine en fault,
C’est grant negligence, c’est mon.
15 A cellui vault pou le sermon
Qui la parole a escoutee,
Se sa vie n’est amendee.
Lors doit ses vices retranchier.
Estrepons male herbe dampnee :
20 Faisons le bon plant aluchier.
Car le plant mauvais tout assault
Qui court sanz resne et ha bandon
Es estas, dont trop petit chault
Aux laboureurs. Or regardon
25 Qu’il en advient. Ceulx perdent nom
Qui tel semence ont ahannee,
La terre en est deshonouree,
Le monde en vit a grant dangier.
Soit ceste chose reparee :
30 Faisons le bon plant aluchier.
L’envoy
Prince, soit bonne herbe plantee,
La mauvaise desracinee.
Mettéz partout bon jardinier.
Lors arons terre bonneuree
35 Et fruit de bonne renommee :
Faisons le bon plant aluchier.
[1] Ms. tele
