Balade 591 : Si vielle suy et de si long temps nee (DCCCCXXXIX)
Autre Balade de la complainte de gramaire
Si vielle suy et de si long temps nee
Que nul ne veult plus ma doctrine entendre,
Et si fu [je] la premiere ordonnee,
Qui les .vii. ars fis a pluseurs apprendre,
5 Et les plus grans fis maintes foiz du mendre,
A rude engin, par fort continuer.
Goute d’yaue fait la pierre caver, 244b
Si fait aussi continuacion
De poursuir, retenir, demander :
10 Mais des .vi. ars voy la destruction.
Gramaire m’ont mainte gent appelee,
Qui l’a. b. c. faiz aux enfans aprandre,
Joindre, assembler. Par ce regle donnee
Leur est a tous de monter et descendre
15 […]
Aux autres ars, de sçavoir carculer,
Logique oir, de saigement parler,
Souldre et mouvoir en toute question,
Grec et hebrieu, et le latin parler :
20 Mais des .vi. ars voy la destruction.
A moy ne vient c’une gent aveuglee
Qui ne veulent qu’a françois lire, entendre,
Lors aux changes vont en quelque contree.
La les vient on par certains moiens prandre,
25 Puis font tantost leurs estaz croistre et tendre
Par le seul us de getter et compter,
Qui les .vi. ars veult par tout surmonter
Et prant sur eulx la dominacion.
Ou temps qui est bien n’y puis esperer :
30 Mais des .vi. ars voy la destruction.
L’envoy
Prince, trop est celle art cy eslevee.
Aux .vi. autres tout bon engin se vee.
Si que desja fault Justice et raison
Pour ce qu’om het science auttorisee :
35 Tuit vont getter la finance amassee :
Mais des .vi. ars voy la destruction.
