Balade 590 : Gramaire, logique, rhetorique (DCCCCXXXVIII)
Autre Balade d’arismetique
[O] gramaire, logique, rhetorique,
Astronomie et geometrien,
Musique aussi, a vous .vi. fait la nique
Celle qui prant l’autruy avec le sien.
5 Qui est elle ? Le peuple le scet bien :
Arismetique qui toudis compte et gette.
Generaulx a, tresoriers et recepte.
En tous pais a de ses gens espars.
Dont grant plaie est par tout le monde fette,
10 Quant regner voy le mendre des .vii. ars.
Las ! et qui a mis sur ceste pratique
Et fait regner celle qui ne scet rien,
De droit, de loy, de science authentique,
De soy garder, qui het le commun bien, 244a
15 Qui ses gens fait de vil et ort merrien
Pour gouverner la finance qu’on trette,
Qui het le voir et la mençonge atrette,
Qui du commun fait lever mille, et Mars
Vivre a dangier ? Ce m’ennuye et deshette,
20 Quant regner voy le mendre des .vii. ars.
Qui a nul bien de present ne s’applique
Fors a avoir condicion de chien,
Faire maisons de nouvelle fabrique,
Thesaurier, estre praticien,
25 Et tout muer le bon temps ancien
En meurs mauvais, par la froide planette
Ou Antecrist doit regner, et sa sette,
Large aux chetis, aux prodommes eschars.
Verité suis : Justice est imparfaitte
30 Quant regner voy le mendre des .vii. ars.
L’envoy
Prince[1], advison la loy en Levitique,
Gardons la foy, la vie politique,
Au bien commun pensons de toutes pars,
Ne procedons par art de voie oblique,
35 Car dervee devien et frenetique,
Quant regner voy le mendre [des].vii. ars.
[1] Ms. Princes
