Balade 589 : Le mendre de tous les .vii. ars (DCCCCXXXVII)
Balade comment le mendre des .vii. ars fondé sur pure convoitise regne au jour d’ui de toutes pars
Le mendre de tous les.vii. ars,
Fondé sur pure convoitise,
Regner au jour d’ui de toutes pars
Tant es grans cours comme en l’eglise,
5 Car ceuls de cel art ont grant mise
D’argent, pour compter et getter.
A ceuls voit on terre achater,
Faire chasteaulx et edifices
Et dessus tous estas regner :
10 Subgiéz tiennent tous les offices.
Ceuls sont pour le conseil esgars,
Ceuls sont cause de toute prise,
Ceuls sont au bien commun couars,
Ceuls sont le recept de faintise,
15 Ceuls sont l’ardent feu qui atise
Les laches chiers a rapiner,
Or et argent querre et miner
Sur le peuple, a ce sont propices.
Par eulx fault maint regne finer.
20 Subgiéz tiennent tous les offices.
Ilz font les princes estre eschars 243d
Vers ceuls qui ont science acquise,
Aux vaillans hommes qui sont ars,
Prins et destruiz, pour leur servise.
25 Justice n’ayme nul[1] ou prise,
Mais partout la veulent fouler.
Aux chetis font les dons donner
Et leur paient, et par telz vices
Et tel art qu’om deust rebourser,
30 Subgiéz tiennent touz les offices.
L’envoy
Prince, vueilléz considerer
Ce qui fait les regnes durer,
Justice, sns, peuples. Car nices
35 Est qui fait ces trois deserter
Par telz compteurs trop eslever :
Subgiéz tiennent touz les offices.
[1] Ms. nul deulx
