Balade 588 : L’age premier fu ignorant (DCCCCXXXVI)
Balade comment le premier aage fut ignorant, mais le .viie. a present est malicieux, inique, lasche et decourant
L’age premier fu ignorant.
Le .viie. est malicieux,
Inique, lasche et decourant,
Faintis, desloial, convoiteus,
5 Car il ne vault congnoistre ceuls
Qui ont vertu, qui ont science,
Qui ayment Dieu et conscience,
Mais ne quiert que gens malostrus
Ou nulz ne doit avoir fiance :
10 Ly mondes en seras perdus.
Car telz chetif sont acquerant :
Pour doubte d’estre diseteus[1],
A l’or du puple vont querant.
Tant treuvent de voie entr’eulx
15 Que maint pais font soufraiteus
Pour trouver nouvelle finance.
Grant estat ont. Nul d’eulx ne pence
Qu’a convoiter de plus en plus :
Mais se longues dure tel dance,
20 Ly mondes en sera perdus.
On se moque de bonne gent,
On laisse le conseil des vieuls,
Auctorité ont li enfant,
Dont les choses vont pis que mieulx.
25 Helas ! et que n’y pourvoit Dieux
Et que ne monstre il sa puissance ?
Si fait il, car tout se despence
Folement, et par ce conclus
Que s’il n’y met autre ordonnance,
30 Ly mondes en sera perdus.
L’envoy
Prince, il n’est nulle congnoissance
Fors de mal et de decepvance,
Et des chetis mettre au dessus.
On het tout homme de vaillance,
35 D’onnour, de justice et[2] prudence :
Ly mondes en sera perdus.
[1] Ms. digeteus
[2] Ms. de
