Balade 587 : He ! lasse, povre et desolee (DCCCCXXXV)
Balade
He ! lasse, povre et desolee, 243a
Qui n’ay service ne maison,
Et jadis fu si honouree
De maint prince et de maint baron !
5 Dont leurs enfans heent mon non,
Qui ne me veulent approuchier,
Et leurs peres m’orent tant chier,
Que je servi tresloyalment
Sanz desroy, blasme ou reprouchier :
10 Et comment feray je, comment ?
― Que tu feras, povre esgaree ?
Qui es tu ? ― Fille de Raison :
Mainte chose par moy reglee
Fut jadis. Regle m’appell’on :
15 Moult fut[1] amee de Caton
Et des .vii. ars pour enseignier
Science, et vivre sanz dangier
Par saige et seur gouvernement,
Mais maint me veulent estrangier :
20 Et comment feray je, comment ?
― Tu lairas celle gent desree,
Soies ferme[2] et aies cuer bon,
Car avant que passe l’annee
Faulra maint homme estre maçon
25 A qui je feray, vueille ou non,
Toy, Regle, querir et cerchier,
Et par toy son fait radrecier
Ou perir maleureusement.
Lors te pourras de lui vengier.
30 ― Et comment feray je, comment ?
L’envoy
― Bien. Neccessité appellee
Suy, qui faiz gens a la volee
Tourner vers toy soudainement 243b
Quant leur chevance est degastee.
35 ― Voire, mais trop m’ont despitee :
Et comment feray je, comment ?
[1] SaintHIlaire corrige en fu
[2] Ms. ifermes
