Balade 62bis : Vous qui estes paréz comme espousee (DCCCCXXXII)

Balade[1]

                        Vous qui estes paréz comme espousee,
                        Qui des grans faiz si bien parler sçavéz,
                        Et qui sur touz avéz la renomee
                        D’estre jolis, qui chantéz et dancéz[2],
5                      Et qui les faiz des grans choses penséz,
                        Quant en France est chascun, en son pais,
                        Vez ci Honeur, se querre la vouléz :
                        Vous n’estes pas sur Grant Pont a Paris.

                        Veoir pouéz du roy Charle l’armee
10                    Monter en mer. Sur ce vous adviséz.
                        Servéz le bien de cuer et de pensee,
                        Faictes vers li ainsis que vous devéz.
                        Aiéz bon cuer quant vous arriveréz,
                        Et que chascun soit vaillans et hardis,
15                    Si qu’en la fin nul ne soit diffaméz.
                        Vous n’estes pas sur Grant Pont a Paris.

                        Vous vous boutéz en l’englesche contree
                        Pour conquerir ce que perdu avéz.
                        ― Qu’est ce ? ― Renom, dont vo terre honouree
20                    Fut par long temps. Donques la recouvréz,
                        Et s’en bataille ou assault vous trouvéz,
                        Monstréz vos cuers plus grans que voz habis.
                        Ou autrement seriéz deshonouréz :
                        Vous n’estes pas sur Grant Pont a Paris.

                        L’envoy          242c

25                    Princes, tous ceuls qui sont les mieulx paréz
                        Quant a l’oneur soient les premiers mis.
                        Aviséz bien que fort vous combatéz.
                        Vous n’estes pas sur Grant Pont a Paris.

[1] Pièce identique au f° 15 sous le numéro LXII et au folio 307 sous le n° MCLVII

[2] Saint Hilaire corrige en qui dancez et chantez