Balade 584 : A luis ! Qui est ? Amis. Que veuls ? (DCCCCXXIX)

Autre Balade

                       ― A luis ! ― Qui est ? ― Amis.  Que veuls ?
                        ― Conseil. ― De quoy ? ― De mariaige.
                        Marier vueil. ― Pourquoy te deulx ?
                        ― Pour ce que n’ay femme en mesnaige
5                      Qui gouvernast et fust saige,
                        Bonne, belle et humble tenue,
                        Riche, jeune et de hault paraige.
                        ― Tu es fouls, pran une massue.

                        Advise se souffrir t’en pués.
10                    Femme est de merveilleux couraige,
                        Quant tu vouldras avoir des eufs,                                                     242a
                        Tu auras poree ou frommaige.
                        Tu es frans, tu prandras servaige.
                        Homs qui se marie se tue :
15                    Advise bien. ― Si le feray je.
                        ― Tu es foulx, pran une massue.

                        Femme n’aras pas a ton eulx,
                        Mais diverse et de dur langaige.
                        Adonc te croistera tes deuls,
20                    Souffrir ne pourras son oultraige.
                        Va vivre avant en un boscaige
                        Que marier, com beste mue.
                        ― Non, avoir vueil le douz ymaige.
                        ― Tu es foul, pran une massue.

                        L’envoy

25                    ― Filz, tu feras foleur et raige
                        De marier. Aime en vo rue
                        Franchement. ― D’avoir femme enrraige.
                        ― Tu es foul, pran une massue.