Balade 583 : Se tous li cielz estoit de fueilles d’or (DCCCCXXVIII)
Balade
Se tous li cielz estoit de fueilles d’or,
Et li airs fust estelléz d’argent fin,
Et tous les vens fussent plains de tresor,
Et les goutes fussent toutes flourin
5 D’eaue de mer, et pleust soir et matin
Richesces, biens, honeurs, joyauls, argent,
Remplissent en feu[1] toute la gent,
La terre aussi en fust moilliee toute,
Et fusse nuz, de tel pluie et tel vent
10 Ja sur mon corps n’en cherroit une goute.
Et qui pis est, vous puis bien dire encor
Que qui donrroit trestout l’avoir du Rin,
Et fusse la, vaillant un harenc sor
N’en venrroit pas vers moy vif[2] un frelin.
15 Onques ne fuy de nul donneur fain.
Biens me default, tout mal le vient souvent. 241d
Se j’ay mestier de rien, on le me vent
Plus qu’il ne vault, de ce ne faictes doubte.
Se beneurté plouvoit du firmament
20 Ja sur mon corps n’en cherroit une goute.
Et se je pers, j’a n’en aray restor.
Quant rien requier, on chante de Basin.
Se je faiz bien, neant plus que d’un tor
N’est congneu. Tousjours sui je Martin,
25 Qui cote avoit, chaperon et roucin,
Pain et paine, congnoissance ensement,
Son temps usa, mais trop dolentement,
Car plus povre[3] n’ot de lui en sa route.
Je sui cellui que s’il plouvoit pyment
30 Ja sur mon corps n’en cherroit une goute.
L’envoy
Princes, .ii. poins font ou riche ou meschant :
Eur et meseur, l’un aime et l’autre doubte.
Car s’il [pouoit] plouvoir mondainement,
Ja sur mon corps n’en cherroit une goute.
[1] Saint Hilaire corrige en Tant que remplie en feust
[2] Ms. vaillant
[3] Ms. paine
