Balade 581 : Maistre Mahieu, et vous, maistre Regnault (DCCCCXXV)
Balade
― Maistre Mahieu, et vous, maistre Regnault,
Conseilliéz moy contre aoust et juillet,
Car par dehors me fait ardoir de chaut
Et par dedenz li feux par tout se met.
5 Si je ne boy, il est de mon corps fet,
Car j’arderay et dehors et dedens,
Ne je n’ay cuer, foye, liefres ne dens.
[…][1]
― N’aiéz paour, certes ce fait le temps :
10 Remede nul n’y a que boire fort.
― A quel vaissel ? ― Un demi lot vous fault,
Voirre parfont ou un grant gobelet.
― Paistre, et quel vin ? ― Au froit faictes l’assault,
Qui soir raiant, gracieus, vert, claret,
15 Frique, friant, odorant, vermillet,
Non pas trop fort, et soiéz diligens
Du bien tremper, si facent toutes gens.
Mouilliéz toujours vo bouche a grant effort.
Par le conseil de tous phisiciens,
20 Remede nul n’y a que boire fort.
― Et du mangier ? ― Laitue, aigre vin vault, 240d
O le pourpié, qu’om tiengne son corps net,
Et qu’om fuie le contraire en bersault,
L’ombre tenir et disner matinet.
25 Poree au vert et le jeune poulet,
Vergus de grain et d’orenge, c’est sens,
Et qu’om ne jeue a nulz gieuz eschaufans,
Ne au souleil, car c’est peril de mort.
Qu’om soit joieux, et pour telz chaux ardans,
30 Remede nul n’y a que boire fort.
L’envoy
Prince, mon corps par boire se refet
Des le matin et jusques au cliquet
De la mie nuit me fait vins reconfort.
Quant je le sens si froit, si radelet,
35 J’apperçoy lors qu’en la chalour qui fet
Remede nul n’y a que boire fort.
[1] Vers non édité ou vers manquant non signalé
