Balade 580 : Il a grant faim d’estre chetis (DCCCCXXIV)
Balade
Il a grant faim d’estre chetis,
De chevaulx et corps exillier,
De gaster argent et habis,
De sentir plouvoir et negier,
5 De vivre et gesir a dangier,
Qui par du doulz pais de France,
A grant frait et a grant despence,
Pour veoir Milan et Pavie.
Quant proufit n’y a, ne vaillance,
10 Eustaces dit que c’est folie.
Puis aiguebelle au mont Cignis
Fault entre roches chevauchier,
Quatre ou six jours, tresdur pais,
Et en povres logeis logier,
15 Avoir po a boire et mangier,
Et paier tout a l’ordonnance
Des paisans. Outrecuidance
Fait homme aler en Lombardie.
Sanz grant besoing qui la s’avance,
20 Eustaces dit que c’est folie.
N’est pas bonne vile Paris,
Reins et Rouen pour soy aisier,
Amiens [et] Arras et Senlis
Ou li vivre ne sont pas chier ?
25 La ne fault marron, n’estrangier,
Ne sur la nege avoir doubtance,
N’a la Ferriere desplaisance
Ou l’en pert par cheoir la vie 240c
Souventefoiz. Qui suist tel dance,
30 Eustaces dit que c’est folie.
L’envoy
Princes, desor vueil tenir chier
Senslis, ou li fait beau chacier,
Creal, Biauvoisin et Picardie.
Ainçois me lairoie escorchier
35 Qu’en Lombardie alasse arrier :
Eustaces dit que c’est folie.
