Balade 579 : Des merveilles de quoy on puet parler (DCCCCXXIII)
Autre Balade
Des merveilles de quoy on puet parler
Et qui cheent en raison de nature,
Qu’om puet veoir deça et dela mer
Treuve on bien cause et certaine figure,
5 Pourquoy se font. Mais une est trop obscure
Entre les gens et aux festes royaulx.
La ne voit on sens, raison ne mesure :
C’est de dancier au son des chalemiaux.
Car un soufleur qui commence a soufler
10 En un piau, cornant la turelure,
Fait entour lui mainte gent assembler
Qui de joie n’ont a celle heure cure.
Com hors du sens sautent a desmesure,
Balans des piéz, des mains et des trumeaulx,
15 La ne voit on sens, raison ne mesure :
C’est de dancier au son des chalemiaulx.
Sotie est grant d’ainsi gens demener
Au son d’un foul. Encor plus grant laidure
D’euls tenir coiz quant on laisse a corner,
20 Vous ne verréz lors mouvoir creature :
Le vent n’est rien, nul proufit n’y procure,
Fors le sougleur, gent qui fait telz aviaulx.
La ne voit on sens, raison[1] ne mesure :
C’est de dancier au son des chalemiaux.
L’envoy
25 Prince, l’en puet en tout cause trouver
Des ars mondains, excepté du dancer
Aux instrumens des hommes bestiaulx, 240b
Qui par leur son font les gens enchanter
Et hors du sens maintefois ressembler :
30 C’est de dancier au son des chalemiaulx.
[1] Ms. raison sens
