Balade 578 : Boniface, Miraumont et Poitiers (DCCCCXXII)
Autre Balade
Boniface, Miraumont et Poitiers, 239d
Vilebon, Billi, ceuls de Touraine
Ont Chastelet tenu deux jours entiers
Sur les carreaulx, par la court souveraine,
5 Dont l’un disoit : ― Dieu mette en malestraine
Cellui par qui nous faisons cy le guet !
Car Folie nous a basti ce plet
Par un homme qui a le cul trop chaut.
― Vous dittes voir, ce respont un varlet :
10 Mauditte soit la couille de Brugaut !
Car ce qu’il gist aux femmes voluntiers
Aux samedis et en la quarentaine,
Et que toudis en est plains ses greniers,
Le fist happer asséz pres de Behaingne
15 Par les sergens, et lors crioit s’enseigne.
Mains le suy jusques en Chastelet.
Ramenéz fut et prins par le colet.
Mais l’endemain furent tuit mis en hault
Les rameneurs, ou il fait ort et let :
20 Mauditte soit la couille de Brugaut,
Qui ainsi fait tenir les prinsonniers !
Chastrer le fault, c’est la voie plus saine.
Si ne sera plus ribaut ne putiers,
Ou autrement doubt qu’il ne s’en refraingne.
25 Soit pardonné a la povre compaigne
Pour ceste foiz la foleur qu’elle a fet,
Et l’en face Brugaut chastrer de fet,
Car par ce point ne sera plus ribaux[1].
Puis qu’en prison sont tant, oultre leur het,
30 Mauditte soit la ocuille de Brugaut !
L’envoy
Princes, merci aux povres escuiers :
Delivréz les, vostre grace leur fault.
Poulz et puces ont ja quatre milliers : 240a
Mauditte soit la couille de Brugaut !
[1] Saint Hilaire corrige en ribaut
