Balade 576 : En retournant du palais a saint Pol (DCCCCXX)
Autre Balade
En retournant du palais a saint Pol,
Vy mainte gent complaindre et gramenter.
Et en Greve ribaulx portans au col,
Ne font toudis qu’enquerre et demander :
5 ― Et quant sera le roy au retourner
De Languedoc ? Trop y fait grant demeure :
Il n’a ouvrier a Paris qui n’en pleure,
Car riens ne font. Chascuns est esbahis,
En enquerrant le temps, le jour et l’eure :
10 ― Quant revendra nostre roys a Paris ?
A Petit Pont ne font faucons leur vol,
Ne les brodeurs n’ont gaires a broder.
A bon marchié sont es halles li chol,
Les draps aussi et harnois pour armer. 239b
15 Les cousturiers n’ont gaires a ouvrer.
Sellier n’y a qui petit ne labeure,
Ne fillette qui vers les clercs ne queure.
L’en a asséz d’icelles juste pris.
En demandant courent l’un l’aure seure :
20 ― Quant revendra nostre roy a Paris ?
Les poullailliers et lormiers seront fol :
Riens ne vendent. On laisse le chanter
Es tavernes, car vin sont dur et mol.
Les heaumiers laissent le marteler.
25 Les orfevres n’ont pas trop a dorer.
Je n’y voy nulz fors changeurs qu’on aeure.
Pour ces blans neufs convient qu’om les honeure,
Ilz aront tout l’argent du plat pais.
Dont chascuns dit, a cuer plus noir que meure :
30 ― Quant revendra nostre roy a Paris ?
L’envoy
Prince, pour vous des nouvelles mander,
Quant je les ay ainsis oy parler,
De leurs regrés ceste balade escrips.
Par vo retour se puet tout amender.
35 Mais sanz celi ne puet ce mot cesser :
― Quant revendra nostre roy a Paris ?
