Balade 574 : Chascuns me dit : Dieu vous doint joie (DCCCCXVIII)
Balade
Chascuns me dit : ― Dieu vous doint joie
De vostre nouveau bailliaige
De cent lis ! Mais coissin ne toie
De lit n’ay encor en mesnaige.
5 Pour ce ne vault riens ce langaige.
Quant je n’ay pas un de cent lis,
Je ne suis pas de cent baillis,
Non mie d’un seul pour certain.
Cilz titres m’est du tout faillis :
10 Il me fault couchier sur l’estrain,
Aussi n’est il sens c’on y voie,
Ces .ii. mos n’ont fors que l’usaige
Du parler, sens fait toute voye,
Car sens et liz sont en umbraige.
15 L’un ne l’autre n’ay, c’est dommaige
Pour moy, qui n’en suis pas garnis.
Ainsis suis des gens escharnis
Qui me nomment des deux en vain.
S’autre remede n’y est mis, 238d
20 Il me fault couchier sur l’estrain,
Et faire couste d’une cloie
Et coussin d’un fais de ramaige
Et dossier de terre ou de croie,
Comme on fait en un hermitaige.
25 Je ne suis c’un bailli sauvaige
Duquel l’ostel est mal fournis :
Les arondes y font leurs nis
Et li cahuant, soir et main.
Se je n’ay aucuns bons amis,
30 Il me fault couchier sur l’estrain.
L’envoy
Princes, s’autres noms ne m’est mis,
Ou n’y pourvoiéz plus a plain,
J’auray un trespovre logeis :
Il me fault couchier sur l’estrain.
