Balade 573 : En tous estas est espargne en saison (DCCCCXVII)

Autre Balade

                        En tous estas est espargne en saison,
                        N’estre ne puet du sien trop bonne garde,
                        Soit blef ou vin ou autre garnison.
                        Pour ce est saiges qui a ces poins regarde,
5                      Car d’un festu mis a part, quoy qu’il tarde,
                        Puet un chascun ains l’an avoir mestier.
                        Trois choses hors, c’est cocart ou cocarde,
                        Et de putain ne face ja grenier.

                        Car en ces trois n’a sens, bien ne raison.
10                    Conardie fait conart et conarde,
                        Et putain fait larrecin, traison,                                                           238c
                        Pechié de char et son visaige farde,
                        Homme destruit, de deshonneur le larde
                        Tant qu’ame et corps y pert au derrenier.
15                    Qui saiges est, de telz vices se garde
                        Et de putain ne face ja grenier.

                        Car telz grains fait empirer la maison
                        Tout happe et prant, elle a œil de renarde.
                        De tel grenier devient chascun mais hom,
20                    On en pant l’un souvent fault que l’autre arde.
                        Au commencier fait trop la papelarde
                        Et toudis tent a prandre et a mucier :
                        Voist homs jouer a escu ou a darde
                        Et de putain ne face ja grenier.