Balade 572 : En tous cas est largesce renommee (DCCCCXVI)

Balade

                        En tous cas est largesce renommee,
                        Aux donneurs fait avoir grace et renon,
                        Du monde a los, elle est de Dieu amee
                        Qui du mantel Martin reçut le don,
5                      Duquel donna a son povre un copon
                        Pour lui couvrir au dehors [pres] d’Amiens.
                        Face chascun largesce de ses biens
                        Fors en un cas qui engendre dolours.
                        La fault moyen. Saige, ce mot retiens :                                             238b
10                    Ne face nul grant largesce d’amours.

                        Mais d’autres biens soit faicte la donnee
                        Aux povres Dieu, pour l’ame avoir pardon.
                        La maison soit aussi habandonee
                        Des grans seigneurs. Prelas aient le non
15                    D’aidier les clercs et qu’ilz leur soient bon.
                        Marchans, bourgois, ne facent comme chiens
                        Qui tout mangue et ne veult donner riens.
                        Soient piteux, facent humble secours
                        Aux soufraiteux. Au surplus je maintiens,
20                    Ne face nulz grant largesce d’amours.

                        Par le monde ot Alixandre nommee,
                        Par largement donner a maint baron.
                        Vaspasien, Titus, qui a l’espee
                        Jherusalem subjuga, ce scet on,
25                    Largesce voult. Mais en celle amour non,
                        Qui au corps nuist, c’est perilleux liens.
                        L’ame destruit en ordure et [en] fiens
                        De luxure, c’est vilz pechiéz et lours.
                        Pour ce suppli a tous les terriens :
30                    Ne face[1] [nulz] grant largesce d’amours.

[1] Ms. facent