Balade 571 : Moult se vantoit li cerfs d’estre legiers (DCCCCXV)
Autre Balade
Moult se vantoit li cerfs d’estre legiers
Et de courir dix lieues d’une alaine,
Et li cengliers se vantoit d’estre fiers,
Et la brebiz se louoit pour sa laine,
5 Et li chevriaux de sauter en la plaine
Se vantoit fort, li chevaux[1] estre biaux,
Et de force se vantoit li toreaux,
L’ermine aussi d’avoir biau peliçon.
Adonc repsont en sa coquille a ciaulx :
10 « Aussi tost vient a Pasques limeçon. »
Les lions voy, ours et lieppars premiers,
Loups et tigres, courir par la champaigne,
Estre chaciéz de mastins et levriers
A cris de gens, et s’il est qu’om les praingne 238a
15 Tant sont hais que chascun les mehaingne
Pour ce qu’ilz font destruction de piaulx.
Ravissables sont, fel et desloyaulx
Sanz espargner, et pour ce les het on.
Courent ilz bien, sont ilz fors et isneaulx ?
20 Aussi tost vien a Pacques limeçon.
Cellui voient pluseurs par les sentiers :
Enclos se tient en la cruise qu’il maine,
Sanz faire mal le laiss’on voluntiers,
Tousjours s’en va de sepmaine en sepmaine.
25 Si vont pluseurs en leur povre demaine
Qui vivent bien soubz leurs povres drapeaulx,
Et s’il ne font au monde leur aveaulx,
Si courent ilz par gracieus renon
Quant desliéz sont aux champs buefz et veaulx :
30 Aussi tost bien a Pasques limaçon.
L’envoy
Prince, les gens fors, grans, riches, entr’eaulx
Ne tiennent pas toudis une leçon.
Pour eulx haster n’approuche temps nouveaulx :
Aussi tost vient a Pasques limaçon.
[1] Ms. chevriaux
