Balade 570 : Guetier par nuit, de jour a la barriere (DCCCCXIV)
Balade
Guetier par nuit, de jour a la barriere,
Edifier[1] tours et arrier[2] fosséz,
Soudaulz avoir, arrierguet par derriere,
Estre tousjours de haubergon arméz,
5 Faire escoutes qu’on ne soit escheléz,
Savoir le cri de la nuit au certain,
Arbalestriers, et avoir capitain
Aconvenu, et souvent guerroier
Jusques a cy. Or fault, si com le tain,
10 Voler, chacier, jouster et tournoier.
Soufert avons au temps ça en arriere
Guerre et tourmens dont trop sommes fouléz.
Guez de chasteauls, mainte parole fiere,
Des ennemis tuéz et ransonnéz.
15 Le plat pais a este tel menéz
Que l’un estoit Genevois, l’autre Yvain,
Si que prodoms n’osoit logier a plain.
Or nous veult Dieu le bon temps envoier.
Se paix avons, il fault de main en main 237d
20 Voler, chacier, jouster et tournoier.
Ainsis rarons nostre vie premiere
Et revendront les gens desheritéz
A leurs labours, faire de lie chiere
Dances, chançons, festes et menestrelz.
25 Justice, loy, raison et veritéz
Qui a chascun tendront droitte la main.
Ainsis le veult le prince souverain
Pour lequel doit moult le peuple prier,
Quant de guerre nous fait par cas soudain
30 Voler, chacier, jouster et tournoier.
L’envoy
Prince[3], en tous cas de la guerre me plain :
Vueilléz a paix vostre cuer avoier
Tant que nulz homs n’ait desor en desdain
Voler, chacier, jouster et tournoier.
[1] Ms. Et edifier
[2] Ms. arriere
[3] Ms. Princes
