Balade 569 : Il me convient remettre a mon mestier (DCCCCVIII)

Autre Balade

                        ― Il me convient remettre a mon mestier :                                       235b
                        Je voy aler justice en plat pays.
                        ― Et qui es tu ? ― Je suis un savetier.
                        ― En tel estat ? ― En es tu esbahis ?
5                      ― Ouil, par Dieu. ― Li temps fut tel jadis
                        Qu’om se deffist pour autrui estat prandre,
                        Touldre et rober, si que j’en suis hais :
                        J’ai grant paour qu’om ne me vueille pandre.

                        ― Ont ainsis fait garçon li chevalier,
10                    Comme je voy, qui portes telz habis ?
                        ― Ouil, certes. Prestres et escolier,
                        Chetives gens, chanoine[1] et moins gris,
                        Dont li peuples est las et amaigris,
                        Qui ne s’osoit de nous autres deffendre.
15                    Or me convient rendre ou estre fuitis :
                        J’ay grant paour qu’on ne me vueille pandre.

                        Je n’aray plus ne roucin ne trotier,
                        Et si seray de pluseurs poursuis.
                        Se je suis prins, je doubte le goisier :
20                    Dures gens sont et prevost et baillis.
                        Il n’a pas paix qui d’eulx est assaillis :
                        En gehinant font trop larrons estendre.
                        ― Fuit t’en bien tost. ― Vous dittes comme amis :
                        J’ay grant paour c’on ne me vueille pandre.

                        L’envoy

25                    ― Povre meschans, prodoms doit estre chier,
                        Car par tout va, nulz ne le puet reprandre.
                        ― Vous dittes voir. Or me convient mucier :
                        J’ay grant paour qu’on ne me vueille pandre.

[1] Ms. chanoines