Balade 568 : Je ne me plains en riens de Doulz Penser (DCCCCVII)

Autre Balade

                        Je ne me plains en riens de Doulz Penser,                                        235a
                        De Souvenir, ne d’Espoir qui me fault,
                        Ne de Desir qui me fait tourmenter,
                        Ne de Refus qui par derrier m’assault,
5                      Ne de Dangier, de tous ceuls ne me chault.
                        Mais je me plaing d’un perilleus couart
                        Qui son siege a sur le front pres du hault :
                        Pour ce hair doit chascun Mauregart.

                        Car nulz [ne] puet en lui bien esperer,
10                    Ainçois a tous bonne esperance tault.
                        A droit ne veult nulz hom[me]s regarder
                        Fors de travers. Feu et flambe li sault
                        Par les .ii. oeulx. Ceuls dont il fait bersault
                        Sont plus navréz que d’arbaleste ou dart.
15                    Je le sçay bien, feru m’a en sursault :
                        Pour ce hair doit chascuns Mauregart,

                        Que l’en puet bien basilique nommer
                        Par son regart venimeux qui assault
                        Fait chascun jour a maint pour li tuer,
20                    Par son venin un tresfort homme chault
                        Le front rougir. Amour, c’est grant deffault :
                        Envoiéz loy a demourer autre part.
                        Par li perdréz tous amans, riens ne vault :
                        Pour ce hair doit[1] chascuns Mauregart.

                        L’envoy

25                    Princes d’amours, vueilléz nous delivrer
                        De ce serpent qui sont venin espart
                        Sur voz subgiéz, ou il nous fault finer :
                        Pour ce hair doit chascuns Mauregart.

[1] Ms. doit hair