Balade 567 : Alarme ! Alarme ! Yvers est descendus (DCCCCVI)
Autre Balade
Alarme ! Alarme ! Yvers est descendus
Sur le pais, a froide compaignie :
Il en a ja mains mors et enfondus.
Arméz vous tost pour sauver vostre vie,
5 Car nulz ne tient contre s’artillerie.
Vent et gresil fait traire a ses archiers.
Gelee et noif <fait traire a ses archiers> 234d
Et bise fait la bataille premiere.
Les mal arméz assaudra tous premiers :
10 Garnisséz vous, avant qu’iver vous fiere,
De bons harnois, de bons chauçons velus,
D’escafillons, de sollers d’abbaie,
Pour poins fourréz, les plates pardessus,
De gardebras pour le trait en partie.
15 Un jaque[1] aiéz ou grant cotte hardie.
Pour ganteléz parléz aux peletiers.
Martres et gris achatéz voluntiers,
Grans chaperons et cornette a visiere,
Peaulx de chameulx et draps fors et entiers :
20 Garnisséz vous avant qu’ivers vous fiere.
Et ne soiéz rez, baingniéz ne tondus.
Mais vos menteaulx fourréz n’oubliéz mie.
Chaudes chambres natees sus et jus,
Les huis ferméz, fenestre qui ne crie,
25 Le chaut civé et bonne espicerie,
Des meilleurs vins, chapons, connins, plouviers,
Garnache avant, ypocras soit portiers.
De bon duvet faictes vostre litiere.
Ainsi fuiréz la froidure, amis chiers :
30 Garnisséz vous, avant qu’iver vous fiere.
L’envoy
Princes, yvers les povres gens guerrie,
Les mau vestus et les chetis escrie,
Perdre leur fait planche, point et barriere.
Les riches non, car chascuns estudie
35 Contre le froit, et, quoy que nulz vous die,
Garnissiéz vous, avant qu’yver vous fiere.
[1] Ms. jaques
