Balade 566 : Je me desmet de toute consequance (DCCCCV)
Autre Balade
Je me desmet de toute consequance
Et me rapporte a l’ancien usaige,
Bien observé en Champaigne et en France,
Que les chasteauls roiaulx ont leur chaufaige
5 En temps d’iver, hors bois et en boscaige,
Pour le parois et les murs reschaufer,
De certains bois que l’en fait delivrer
Aux chastellains. Pour ce comme bailli
N’enten ce bois, mes seigneurs, demander :
10 Pardonnéz moy, se j’ay en riens failli.
Mais le requier com faisant residence,
Ayans hostel, mon estat et mesnaige
A Compiengne, ou chastel qui se lance
Dessus Aysne, lez le point du rivaige.
15 Tel froit y fait en yver que c’est raige,
Tant que sanz feu n’y pourroit nulz durer.
[…][1]
Ce non obstant m’a le vent assailli
Qui me destruit. Vueilléz ce regarder :
20 Pardonnéz moy se j’ay en riens failli.
Je me soubmet a vo bonne ordonnance,
Vous[2] estes tuit homme discret et saige.
N’aiéz regart si j’ay, par ignorance,
Mal impetré, corrigiéz le langaige.
25 Consideréz moy estre en un halaige 234c
Et le seurplus qu’om doit considerer,
Et me faictes la quelque bois livrer,
Ou cest yver seray trop mal bailli.
Ne souddréz pas que je doie engeler :
30 Pardonnéz moy, se j’ay en riens failli.
L’envoy
Treschiers[3] seigneurs, d’avoir ma delivrance
Et vostre grace humblement vous suppli.
Ma requeste n’aiéz en desplaisance :
Pardonnéz moy, se j’ay en riens failli.
[1] Vers manquant
[2] Ms. Et vous
[3] Ms. Mes treschiers
