Balade 565 : Trois manieres truis de chevaulx, qui sont (DCCCCIV)
Autre Balade
Trois manieres truis de chevaulx, qui sont 234a
Pour la jouste les uns, nomméz destriers,
Haulz et puissans, et qui tresgrant force ont.
Et les moiens sont appelléz coursiers :
5 Ceuls vont plus tost pour guerre et sont legiers.
Et les derrains sont roucins, et plus bas
Chevaulx communs qui trop font de debas :
Aux labours vont, c’est du gendre villain.
Quant jeunes sont, tout ruent en [un] tas :
10 Pour ce ne doit nulz homz amer poulain.
Pour quoy ? Pour ce qu’il se cuide et qu’il ront,
En traversant des grans chevaulx sentiers,
Et en alant, s’embrunche et tient son front
Par devant eulx, comme orgueilleus et fiers,
15 Sanz regarder, car de ce est coustumiers.
Mais grans chevaulx s’areste et va le pas,
Quant il est fais, sanz ruer en tous cas,
Et plus courtois bien s’ordonne en son frain.
Ce ne fait pas uns petis poutriaux cras :
20 Pour ce ne doit nulz homs amer poulain.
Car telz poulains versent et verseront
Euls et touz ceuls qui les lievent premiers,
Si qu’a la fin les couls se casseront,
Ou advendra c’uns chevaulx grans et fiers
25 Ne pourra plus endurer leurs dangiers,
Si les rura a terre et fera cas
Tant qu’ilz mourront soudainement tous plas.
Par tel orgueil roucins meurent tout plain.
Les chevaulx fais vont mieux a droit compas.
30 Pour ce ne doit[1] nulz homs amer poulain.
L’envoy
Princes, chevaulx qui est granz et pleniers[2] 234b
Et faiz du dent, est meilleur et plus sain
C’un roucin court, jeune et en ses cuidiers.
Pour ce ne doit nulz homs amer poulain.
[1] Ms. devroit
[2] Ms. plumiers
