Balade 564 : A mon seigneur le duc de Bourbonnois (DCCCCIII)

Supplicacion

                        A mon seigneur le duc de Bourbonnois
                        Supplie Eustaces, li baillis de Senlis,
                        Comme le temps li deviengne trop frois,
                        Et lui aiéz hoppelande promis
5                      Pour cest yver, et la panne de gris,
                        Qu’il vous plaise de vo benigne grace
                        Que de vo don soit paiéz a Paris :
                        Si prira[1] Dieu pour vous ledit Eustace.

                        D’octobre vient et s’approuche li moys,
10                    Que gelees vendront sur le pays
                        No, decembre, et janviers li destrois,
                        Fevrier et mars, de nature ennemis.
                        Or est au bois, a la froidure, mis
                        Le suppliant qui trop doubte la glace.
15                    Ne soiéz donc de lui paier remis :
                        Si prira[2] Dieu pour vous ledit Eustance,

                        Qui sur sa teste a grant froit a la fois
                        Pour ses chevaulx qui s’en sont departis.
                        Chaperon fault : si requiert au Galoys,
20                    Chasteaumorant[3], a Bischecourt aussis,
                        Charles[4] et Hutin et tous ses bons amis,
                        Que chascun d’eulx sa besongne pourchace
                        Par devers vous. Or ne soit escondis :
                        Si prira Dieu pour vous ledit Eustace.

[1] Ms. priera

[2] Ms. priera

[3] Ms. A chasteaumorant

[4] Ms. Charles