Balade 563 : J’ay par cinq ans esté en maladie (DCCCCII)

Balade

                        J’ay par cinq ans esté en maladie,
                        Dont mire nul ne m’a voulu guerir,
                        De pou d’argent, ou maint homme mendie.
                        Or ay trouvé qui m’a fait l’uis ouvrir
5                      De surgien pour mes plaies garir,
                        Li quelz m’a dit que je seray tous sains.
                        Mais il me fault endurer et soufrir
                        Le mal que j’ay jusqu’aprés la Toussains.

                        Si n’ay espoir en chose qu’on me die,
10                    Pour le penser qui ne me laist dormir
                        Et la paour que j’ay qu’om ne m’oublie
                        Pour autres gens que je voy poursuir.
                        Tant de povres a un huis requerir
                        Fait leurs clamours escondire[1] et leurs plains.
15                    Pour l’amour Dieu, vueilliéz faire fenir
                        Le mal que j’ay jusqu’aprés la Toussains.

                        Aprés ce jour, je, Eustace, supplie
                        Que vous vueilléz a mon mal secourir
                        Et ordonner en l’apothicairie
20                    Jaque Hemon chose qui puist[2] tenir
                        Sanz recoupper, qui me face adoucier
                        De povreté les maulx dont je suis plains.
                        Si non, bien sçay que me fera mourir
                        Le mal que j’ay jusqu’aprés la Toussains.

25                    Flament, Pierre, Crestien, je vous prie,                                             233d
                        Garissiéz moy, vous estes sou[ve]rains,
                        Ou autrement perdre fera ma vie
                        Le mal que j’ay jusqu’aprés la Toussains.

[1] Ms. fait escondire leurs clamours

[2] Ms. se puist