Balade 560 : Ho ! ho ! Raison ! Je dors, je dors (DCCCXCVIII)

Autre Balade

                        Ho ! ho ! Raison ! ― Je dors, je dors.
                        Qui es tu ? ― Lasse ! euvre moy l’uis.
                        Povreté suis [je] ça dehors,
                        Qui Justice ne Loy ne truis.
5                      ― Ou sont ilz ? ― Ilz sont en un puis,
                        Et Drois est contrais et bossus.
                        ― Force me tient, yssir ne puis.
                        Tout va ce que dessoubz dessus.

                        ― Que feray je ? ― Tiens t’[1]aux plus fors.
10                    ― L’en me toult de jours et de nuis
                        Tout ce que j’ay. ― Et qui ? ― C’est Tors.
                        D’aler contre moy est trop duis.
                        Chastiéz loy, s’il est destruis,
                        Encor sera ly mondes surs[2].
15                    ― Je n’y puis rien, ce n’es que guys :
                        Tout va ce que dessoubz dessus.

                        Justice deust par ses effors
                        Pugnir, preste a conseil[ler] suis,
                        Et Droit deust rendre loy au corps
20                    Et sentence, mais comme uns gluis
                        Se ploie, et Justice est la duis
                        Qui trop se trait de moy ensus.
                        Faintise court par ses conduis :
                        Tout va ce que dessoubz dessus.

25                    ― Adieu, dist donc Povreté lors :
                        Voz pouoirs est frains et fendus,
                        Les bons usaiges sont tous mors.
                        Tout va ce que dessoubz dessus.

[1] Ms. toy

[2] Saint Hilaire corrige en sus