Balade 559 : Savéz vous pour quoy je fais (DCCCXCVI)

Autre Balade

                        Savéz [vous] pour quoy je fais
                        Si maugracieuse chiere ?
                        Pour ce que trestous mes fais
                        Vont ce que devant derriere.
5                      Je vois moins avant qu’arriere,                                                           231d
                        L’en ne me tien nul convent.
                        Mais j’aprandray la maniere
                        De mentir, puis qu’om me ment.

                        Je ne cuidasse jamais
10                    Que ma douce dame chiere
                        Me queist tant de delais,
                        Ne qu’elle fist [ja] barriere
                        D’autre pour moy [en] arriere
                        Bouter si couvertement.
15                    Mais j’aprandray la maniere
                        De mentir, puisqu’om me ment.

                        Car il n’est ne clers ne lais,
                        Marchant, ouvrier n’ouvriere
                        Qui n’ait a mentir palais :
20                    Il ne regne autre banniere.
                        S’elle puet tenir frontiere,
                        Tout sera mis en tourment.
                        Mais j’aprandray la maniere
                        De mentir, puisqu’om me ment.