Balade 558 :Trois choses sont de quoy je ne faiz compte (DCCCXCV)

Autre Balade

                        Trois choses sont de quoy je ne faiz compte,
                        Qui bonnes sont par le dit de la gent :
                        Bonne bufe, qui fait doleur et honte :                                                231c
                        Un [bon] rifle, qu’om nomme bon sergent,
5                      Qui jusqu’au lit va tout executant.
                        Bonne lieue, ou l’en ne puet venir
                        A fin n’a bout, ains va chascun lassant :
                        De ces trois bons ne vueil nul retenir.

                        Autre langaige y a que l’en raconte,
10                    Que chascuns dit asséz communement :
                        « Je m’en tairay, dit tel. A moy[1] qu’en monte ?
                        J’en[2] parleray par tout si hautement. »
                        Taire s’en doit, puis parle incontinent,
                        Vrais contraires de son propos tenir.
15                    Et quant ces poins vois bien considerant,
                        De ces trois bons ne vueil nul retenir.

                        Puis dit aucuns qui nicement se dompte,
                        Quant l’en parle d’aucun aucunement,
                        Et il touche son fait, lors se mescompte :
20                    Dit : « Je ne sçay, mais bien sçay vraiement. »
                        Or n’en scet rien, puis scet, et ainsis ment.
                        De telz sos mos me puet trop souvenir,
                        Des bons mauvais qui font empeschement :
                        De ces trois bons ne vueil nul retenir.

[1] Ms. dit ma a toy

[2] Ms. Mais jen