Balade 557 : Aussi tendre comme un poucin (DCCCXCIV)

Balade

                        Aussi tendre comme un poucin,
                        Et plus doulz que n’est miel en ree,
                        Qui tart couche et dort grant matin,                                                  231b
                        C’est li enfes de la Barree.
5                      Une heure haitiéz [se] desree
                        Et va saillant comme uns poissons.
                        L’autre est simples comme espousee :
                        Il a tousjours eufs ou pigons.

                        Une heure veult estre au hutin,
10                    L’autre heure doubte la gelee.
                        Une heure li fault le coussin,
                        L’autre heure est la chambre fermee.
                        Autre heure a la teste enrumee
                        Et lui convient boire poisons
15                    Et rostir en la cheminee :
                        Il a toudis œufs ou pigons.

                        Pour ce lui fauldra en la fin
                        Une litiere bien voirree.
                        Il fait bon estre son voisin
20                    Pour avoir de la cuminee[1].
                        Une heure veult de la puree,
                        L’autre heure connins et chapons.
                        Sa vie est tout triboulee.
                        Il a toudis œufs ou pigons.

[1] Ms. curminee