Balade 556 : Je fu l’autrier trop mal venuz (DCCCXCIII)

Autre balade

                        Je fu l’autrier trop mal venuz
                        Quant j’alay pour veir Calays.
                        J’entray dedenz comme cornuz,
                        Sanz congié. Lors vint .ii. Anglois,
5                      Granson devant et moy aprés,
                        Qui me prindrent parmi la bride.
                        L’un me dist : ― Dogue. L’autre : ― Ride.
                        Lors me devint la coulour bleue :                                                       231a
                        ― Goday, fait l’un. L’autre : ― Commidre.
10                    Lors dis : ― Oil, je voy vo queue.

                        Pour mal content s’en est tenuz
                        L’un d’eulx, qui estoit le plus lays,
                        Et dist : ― Vous serés retenuz
                        Prinsonnier, vous estes forfais.
15                    Mais Granson s’en aloit adés
                        Qui en riant faisoit la vuide :
                        A eulx[1] m’avoit trahi, ce cuide.
                        En anglois dist : ― Pas ne l’adveue.
                        Passer me font de Dieu l’espite.
20                    Lors dis : ― Oil, je voy vo queue

                        Puis ay mes talons estenduz
                        De mon roucin, le serray pres,
                        Lors sault, si furent espanduz.
                        Deléz Granson fut mes retrais.
25                    La ne me vault treves ne pais,
                        De paour la face me ride,
                        De tel amour ma mort [me] cuide.
                        Au derrain leur dist : ― Je l’adveue.
                        ― Chien, faisoit l’un, vez vous vo guide ?
30                    Lors dis : ― Oil, je voy vo queue

[1] Ms. Deulx