Balade 550 : Bon fait avoir varlet de congnoissance (DCCCLXXXVII)

Autre Balade

                        Bon fait avoir varlet de congnoissance
                        Qui soit prodoms et saiges par pais[1],
                        Qui de logier ait bonne diligence
                        Et qui ne soit fetart, ne esbahis,
5                      A court de roy soit appert et sutils,                                                   229c
                        Au deslogier treuve son maistre en place
                        Mieux que n’a fait Jehannin, varlet Eustace.

                        Car a Nemours, sanz cheval et sanz lance,
                        Laissa illec son maistre li chetis
10                    Sanz le querre, dont il fut en doubtance
                        Que son varlet ne fust renduz fuitis.
                        Un cheval noir emmenoit et un gris
                        Sa male aussi. [Son service] face
                        Mieulx que je fist Jehannin, varlet Eustace.

15                    Adonc faisoit tresorde contenance
                        Et bien sembloit qu[e] il fust desconfis,
                        Quant Braquemont avec[2] ses gens avance
                        Aprés le roy, los lui fut bons amis.
                        Il rapporta qu’il fuoit le logis.
20                    S’a bien mestier d’un autre qui lui face
                        Mieulx que n’a fait Jehan[nin], varlet Eustace.

[1] Ms. le pais

[2] Ms. de