Balade 549 : Quant l’esprevier vole bien pour l’aloe (DCCCLXXXVI)

Autre Balade

                        Quant l’esprevier vole bien pour l’aloe
                        Il soufist bien sanz voler pour le gros,
                        Et se l’autour vole l’ostarde et l’oe                                                   228b
                        Souffire doit, et pour ce bien dire os
5                      Que faulcon doit [tres]hault prandre ses vols
                        En poursuiant le heron blanc ou bis
                        Quant il le prant, mais plus doit avoir los
                        Un esprevier qui prant vielle perdris.

                        Car gentil est et n’a pas longue poe,
10                    En po de temps est faiz, couvéz et pos,
                        Et en aoust fait sur les champs la roe
                        Et de voler n’a nulle fois repos.
                        Cent fois prandra[1] aloe par le dos
                        Et montera, car il est prest toudis.
15                    De soie avoir doit[2] longes, a briés mos,
                        Un esprevier qui prant vielle perdrix.

                        Je voy faucon quant il gette sa croe
                        Et lanneret, que pluseurs sont si mos
                        Qu’ilz faillent bien, car le temps les esbloe,
20                    Aussi sçay je pluseurs a mon propos
                        Qui sont plus gais que n’est jolis au bos,
                        Qui ne prannent grue, pie ou mauvis,
                        Mais ostarde, grans grues, dont je los
                        Un esprevier qui prant vielle perdris.

[1] Ms. prendre

[2] Ms. doit avoir