Balade 548 : Je congnois l’un des jolis chevaliers (DCCCLXXXV)

Autre Balade

                        Je congnois l’un[1] des jolis chevaliers
                        Que l’en peust trouver sur l’Alemaigne
                        Et qui parloit d’amours plus voluntiers,                                           229a
                        Duquel dames congnoissent bien l’ensaigne.
5                                  Mais oncques ne sceu pour qui
                        Il se tenoit si gay jusques a cy
                        Fors pour celle dont il estoit [en]grans,
                        Vielle d’avoir, riche de cinquante ans.

                        Or devendra li maistres escoliers
10                    Qui jamés jour ne sera jors de paine,
                        Ains souffrira moult de menuz dangiers.
                        Car Paris n’a pas prins dame[2] Helaine.
                                    Quant il verra deléz li
                        Helizabeth au viaire pali,
15                    Dire li puet : ― Jamais n’aréz enfans,
                        Vielle d’avoir, riche de cinquante ans !

                        S’il est deçus ce n’est pas li premiers,
                        Qui femme a prins sterile[3] et brehaigne.
                        Ne ne sera aussi li der[re]niers
20                    Qu’avarice de mariage estraine.
                                    Adieu gay, adieu joli,
                        Ce dit Amours qui se revenge ainsi.
                        Desor diréz a la ville et aux champs :
                        Vielle d’avoir, riche de cinquante ans.

[1] Ms. bien

[2] Saint Hilaire suppléé a d.

[3] SaintHilaire supplée et s.