Balade 547 : Je treuve asséz qui me donne a mignier (DCCCLXXXIV)

Autre Balade

                        Je treuve asséz qui me donne a mignier                                           228d
                        Et qui me fait bonne chiere a Paris,
                        Mais mi queval sont sur le tavernier,
                        Qui ne treuvent ne parens ne amis.
5                      Quant j’ay compté je suis tous[1] esbahis,
                        Car pour chascun me fault paier .ii. saulx.
                        Les .iii. par jour font .vi. solz parisis :
                        Ainsi seront tuit mignéz mes quevaulx.

                        Choula me fait mainte foiz requigner.
10                    Et mi varlet veulent estre fournis
                        Qui vont au miel le litiere cerquier
                        Et qui veulent du vin boire toudis.
                        Et mes hostes, qui m’onouroit jadis,
                        De mes rouchins enquiert aux mareschaulx.
15                    Pour s’i paier fait sur tout mettre pris :
                        Ainsi seront tuit mignéz mes quevaulx.

                        J’ay demouré plus d’un mois tout entier,
                        Et si n’ay fait qui vaille deux espis,
                        Ne riens ne puis a le court besongnier.
20                    Las ! je fus né a la foire aux quetis.
                        Or m’en convient raler en mon pais
                        En chevauchant .ii. bastonceaulx de saulx,
                        Se remede n’est brief en mon fait mis :
                        Ainsi seront tuit mignéz mes quevaulx.

[1] Saint Hilaire corrige en tout